دلتك حافظ مقاديرها هيلٍ وبن


طولَت غيبتك واشتاق لك قلبي وحن
والعتب مرفوع يا هاجسي ما دام جيت

أنت من يحمل همومي وإذا ونيت ون
وانت من يفهم شعوري لو إني ما حكيت

إنحمس بن المحبة ونجر الشوق دن
دوب فاحت دلة الشعر من ساعة لفيت

دلتك حافظ مقاديرها هيلٍ وبن
ما نسيت اللي يكيفك والله ما نسيت

اشرب الفنجال الأول من الدلة وثن
ثم عجل بالسوالف وقللي وش لقيت

لا تعذر وانت في جعبتك من كل فن
كلما مريت سوق الغلا بعت وشريت


إبدع القاف المهشِّم وسمعني وغن
ولا تناظر في عيوني تراني ما بكيت

ما عليّ من الرسايل ليا راحن وجن
كم قريت من الرسايل وكني ما قريت

خوة اصحاب المصالح نفاق وضحك سن
من زمان ادري وسويت نفسي ما دريت

الوفا من شيمتي والعطا من دون من
وانت تعرفني ليا خانوا أصحابي وفيت

ما جرحني غير طيبٍ يضيع وحسن ظن
ما هقيت من اقرب الناس والله ما هقيت