منتديات ضي البدر

من صباح السبت لَيْن .. اِنثنت شمس الربوع
كل وجهة لي بها .. ذكرياتك جيتها

يا سقاك الله بالمزن يا ذيك الربوع
كُثر ما حيَّت فِجَاجك (وَنَا) حييتها

والله إنك بالمواصل لنا (مَ انتِ) قطوع
حاضرة في طَرْف عيني إذا أغضيتها

في جبالك ما شكتْ رجلي صعوبات الطلوع
كل بقعه جمَّعتنا أنا مريتها

والشَّجَر يوم التقينا به .. تمايل بالجذوع
في فيافيها قصايد حبنا غنيتها

والطيور اللي مِن اَول مِنَّنا كانت تُروع
يوم شافتني تناجيني (وَنَا) ناجيتها

والبساتين الجميلة بعطرك الدافي تُضوع
ذكرتني عشرةٍ ويّاك اْنا قضَّيتها

كل شي هناك يسأل بالكلام وبالدموع
عَنْك ياللي حافظة كل الأماكن صيتها

يسألون إن كان ممكن للفرح تضوي شموع
وغصت الكلمة وطاحت دمعةٍ أخفيتها

ما دروا باللي سجنته داخل اسْوار الضلوع
وَاْجمل ابيات القصيد اللي تردد ليتها