حتى السكينه تلاشت،

يا قايد الركب .. أمهلني قبل لا تروح
دام النظر حيلة اللي في كلامه شرق

صوت النداء الاخير اللي ملاه الوضوح
ياكثر ما وقفّ اقدامي على مُفترق

وقّفت لي كفٍ يلوّح .. ودمعٍ يلوح
بعيوني اللي توّلاها بعدك الأرق

تخنق عِباراتي العَبرات لا جيت ابوح
والشعر دمع المحابر فوق خد الورق

البيت منفى ونظرات الزوايا جروح
والدمع شيٍ تماكنته .. وشيٍ زرَق

عن الملامح بدت للضحك موجة نزوح
والحزن ياما حطب عوج الضلوع وحرق

حتى العصافير ماعادت تغرد .. تنوح
ولا فيه صبحٍ بعد غيبتك .. نوره شرق

صرتي بغرفة عزل منها الطهاره تفوح
ماينفتح بابها الشفّاف .. للي طرق

لكن برغم التعب لازال وجهك سموح
يمه .. وعرقك من عروق الخزامى و ارقّ

غبتي وانا عقب ماغبتي جسد دون روح
لا الغيث سمّى ولا برق السحايب برق

فيني من الضيق مايعقد حجاج المزوح
حتى السكينه تلاشت والامان انسرق

اليا نجيتو من الطوفان يا اصحاب نوح
مَن ينجي اللي تغشّته الدموع وغرق

رونق ,الــوافــي ,البدر و 1 آخرون معجبون بهذا

جنون الورد ❀

المصدر: منتديات ضي البدر

---

pjn hgs;dki jghajK