من زمان
بحارتنا الصغيرة في حايل
كان فيه جارٍ ما يشبه أحد
أبورايد
رجالٍ بسيط، كبير بالعمر
الله يطول عمره بالايمان وطاعة الرحمن
وعقاله ملفوف، وابتسامته ما تفارق محياه
لكن اللي يميزه عن كل الجيران
إن عنده نجر قديم نحاسي ثقيل
من صناعة العراق
ورثه من أبوه وجده،
ولا يرضى يوم يمرّ
إلا وهو يدقه مع صلاة الفجر
مع أول "الله أكبر" من المئذنة
يدوّي صوت النجر بالحارة
صوت يخلّي العصافير تسكت لحظة
والبيبان تنفتح
والحيّ كله يحس إنه صحى
الجيل الجديد متضايقين
والسكان الجدد
"يا أبو رايد ، هالصوت يقطع النوم!
خلنا نرتاح شوي عقب الصلاة."
لكن أبورايد كان يضحك ويقول:
"يا جماعة، النجر ما هو إزعاج..
النجر حياة
النجر يبشّر بالقهوة
والقهوة ما هي إلا رمز الكرم
وأنا أحب أذكّر نفسي
والجيران كل صبح
إن الدنيا ما تسوى إلا بالخير والعطاء
ومع الوقت تغيّر حال الحارة
صاروا الجيران إذا سمعوا النجر
يتجمعون عقب الصلاة
عند دكة أبو رايد مع ريحة الهيل والزعفران
واحد يجيب تمر
والثاني يجيب قصص من الماضي،
والثالث يضحكهم بنكتة
وكل يوم واحد فيهم يمر الخباز
ويجيب فور للحاضرين
والحارة اللي كانت ساكتة
ومليانة جدران بس
صارت مليانة قلوب متآلفة
وأنا مع الصلاة كل يوم
أفتح شباك غرفتي كل صبح
وأسمع الدقّة وأقول:
"دام أبو رايد موجود..
ما يخاف الحي من الغربة ولا الوحشة
مرت سنين
وضعف صوت يدين أبورايد
صار النجر ما يدوّي مثل أول
لكن العبرة اللي تركها؟
إن صوت النجر
مو بس يد ونجر ونحاس..
هو رمز للكرم
وللجار اللي يحيي جيرانه
قبل ما يحيي نفسه
أبوي دايم يقول:
"يا عيالي
دق النجر مو بس عادة
ترى هي علامة إن فيه جار
يحب الخير
ويبي يذكّرنا إن الدنيا بخير
دام فيها قلوب تنبض على دقة النجر
أبو رايد لو ما دق النجر..
نحس إن الحي ناقص
وصبحنا ناقص
وأنا من جهتي؟
إذا صحيت على صوته
أحس إن اليوم ما راح يخذلني
كأن النجر يبشرني بخيرٍ جاي
09-20-2025, 10:26 AM
العرض المتطور
